თბილისში, რეგიონული შეხვედრა „გარემო და უსაფრთხოების ინიციატივა სამხრეთ კავკასიაში" დაიწყო. შეხვედრა, გარემოს დაცვის მინისტრის მოადგილემ გიორგი ზედგინიძემ, საგარეო საქმეთა მინისტრის მოადგილემ სერგი კაპანაძემ, ეუთოს გარემოსდაცვითი და ეკონომიკური მიმართულების კოორდინატორმა გორან სვილანოვიჩმა და გაეროს ელჩის მოადგილემ სოფიო ქემხაძემ გახსნეს.

გარემოს დაცვის სამინისტროს ინფორმაციით, რეგიონული შეხვედრა ორდღიანია და 4 აპრილს დასრულდება.

„საქართველოში 2008 წლიდან, „გარემო და უსაფრთხოების ინიციატივის" სახით, ეუთოს მისიის მხოლოდ გარემოსდაცვითი ნაწილი განაგრძობს ჩვენ ქვეყანაში მუშაობას საქართველოში რეგულარულად იმართება სამხრეთ კავკასიაში „გარემო და უსაფრთხოების ინიციატივის" შეხვედრები, რომლის მიზანსაც წარმოადგენს საქართველოში ეუთოს გარემოსდაცვითი მიმართულების „გარემო და უსაფრთხოების" ინიციატივის მხარდაჭერით მიმდინარე პროექტების, 2011 წლის სამუშაო პროგრამის განხილვა და სამომავლო ქმედებების დასახვა“,- აცხადებენ სამინისტროში.

შეხედრაში მონაწილეობას იღებენ საქართველოს, სომხეთის და აზერბაიჯანის გარემოს დაცვისა და საგარეო საქმეთა სამინისტროების დელეგაციები, ევროპის უსაფრთხოებისა და თანამშრომლობის ორგანიზაციის, გაეროს განვითარების პროგრამის, გაეროს გარემოსდაცვითი პროგრამის, ჩრდილოატლანტიკური ხელშეკრულების ორგანიზაციის და გარემო და უსაფრთხოების ინიციატივის წარმომადგენლები.

ასევე შეხვედრას ესწრებიან გაეროს ევროპის ეკონომიკური კომისიის, საქართველოში ევროკავშირის დელეგაციის, ევროპის სამეზობლო და პარტნიორობის ინსტრუმენტის აღმოსავლეთ პროგრამის, ბუნების დაცვის საერთაშორისო კავშირის, ავსტრიის განვითარების სააგენტოს სამხრეთ კავკასიის ოფისის, კავკასიის რეგიონული გარემოსდაცვითი ცენტრის, ორჰუსის ცენტრების და სამოქალაქო საზოგადოების წარმომადგენლები.

Internet.ge