უკანასკნელი 5 დღის განმავლობაში ინდოეთში წყალდიდობისა და მეწყერის შედეგად, რომელიც ასამის შტატში გადაუღებელმა წვიმებმა გამოიწვია, მინიმუმ 90 ადამიანია გარდაცვლილი. ამის შესახებ ინფორმაციას ადგილობრივი ხელისუფლება ავრცელებს.

დაახლოებით 2 მილიონმა ადამიანმა დატოვა საკუთარი სახლი, რათა სტიქიისგან დაეღწია თავი. სამხედროები სამაშველო ოპერაციებს აწარმოებენ. მდინარე ბრაჰმაპუტრას და მისი შენაკადების ადიდების შემდგომ რამდენიმე სოფელი რთულად მისადგომ კუნძულად გადაიქცა, ამიტომაც ამ სოფლების მოსახლეობას საკვებსა და სუფთა წყალს ვერტმფრენებიდან უყრიან.

სტიქიის შედეგად ათასობით სული პირუტყვი განადგურდა. ასამის ეროვნული პარკის ცხოველები მაღალ ადგილებში გადაჰყავთ, ვინაიდან პარკის ტერიტორიის 2/3 წყლითაა დაფარული.

ინდოეთის პრემიერ-მინისტრი მანმოჰან სინგჰი მოსახლეობას, შტატის ყველაზე მეტად დაზარალებული რაიონების აღსადგენად, 90 მილიონი დოლარის გამოყოფას დაჰპირდა.

internet.ge