კოპენჰაგენის ზოოპარკში, ვეფხვების გალიაში 21 წლის მამაკაცის გვამი აღმოაჩინეს. გვამის მახლობლად სამი მტაცებელი ცხოველი იყო, რომლებიც ნადავლს გვერდიდან არ შორდებოდნენ. ზოოპარკის თანამშრომლებმა გვამის დარჩენილი ნაწილის გამოტანა მაინც მოახერხეს და პოლიცია გამოიძახეს.

წინასწარმა მოკვლევამ აჩვენა, რომ ვეფხვებმა მსხვერპლს ყელი გამოღრღნეს. გარდაცვლილის სხეულს ნაკბენები აღენიშნებოდა კიდურებსა და სახეზეც.

გამოძიების ინფორმაციით, ახალგაზრდა მამაკაცი თავად შევარდა მტაცებელთა გალიაში, მას შემდეგ, რაც ზოოპარკი დაიხურა. შესაბამისად, სამართალდამცავი ორგანოები თვითმკვლელობის ვარიანტს განიხილავენ.

გარდაცვლილის ვინაობა არ ხმაურდება. ცნობილია, რომ იგი წარმოშობით ავღანეთიდან იყო, თუმცა დანიაში ცხოვრობდა. ზოოპარკის მენეჯერის განცხადებით, დაწესებულების არსებობის 152-წლიანი ისტორიის განმავლობაში მსგავსი შემთხვევა პირველად მოხდა.

internet.ge