საქართველოს მეცნიერებათა ეროვნულ აკადემიაში დღეს, ქართულ-ოსური და ოსურ-ქართული ლექსიკონების პრეზენტაცია გაიმართება, რომელიც  თსუ-ის ლექსიკოგრაფიის ცენტრისა და არასამთავრობო ორგანიზაცია "კავკასიური მოზაიკის" თაოსნობით გამოიცა.

როგორც „ინტერნეტ.ჯი“-ს მეცნიერებათა ეროვნული აკადემიიდან აცნობეს,ოსურ-ქართული ლექსიკონი არასოდეს გამოცემულა, ქართულ-ოსური ლექსიკონი კი, გასული საუკუნის ორმოცდაათიან წლებში ერთადერთხელ გამოიცა და დღეს ბიბლიოგრაფიული იშვიათობაა.

აკადემიის ინფორმაციით, წიგნი ქართველი და ოსი ენათმეცნიერების, ლექსიკოლოგებისა და ლინგვისტების ერთობლივი შრომის შედეგია. ლექსიკონებზე მუშაობდნენ ქართველი და ოსი მეცნიერები თბილისიდან, ცხინვალიდან და ვლადიკავკაზიდან. მისი გამოცემა 2011 წელს ევროკავშირისა და გაეროს განვითარების პროგრამა "კობერმის" მხარდაჭერით დაფინანსდა.

ქართულ-ოსური და ოსურ-ქართული ლექსიკონები თითოეულ ენაზე 25 000-ზე მეტ სიტყვას მოიცავს. ლექსიკონებს ერთვის აკადემიკოს ვასილ აბაევის ოსური ენის გრამატიკული ნარკვევი და აკადემიკოს ავთანდილ არაბულის ქართული ენის გრამატიკული მიმოხილვა. ასევე,  წიგნს დართული აქვს გამოყენების წესები ოსურ და ქართულ ენებზე, ოსური და ქართული ანბანი ტრანსკრიპციით, ასევე - შემოკლებები, განმარტებები და სხვა.

internet.ge