ლონდონის ოლიმპიური თამაშების ოფიციალურ ვებ-გვერდზე, სადაც ყველა მონაწილე ქვეყნის სპორტსმენთა დოსიეებია გამოქვეყნებული, რუსეთის გუნდის წარდგენილი მონაცემებით ე.წ. სამხრეთ ოსეთი და აფხაზეთი რუსეთის ტერიტორიად არის აღნიშნული. 

კერძოდ, ვებ-გვერდზე გამოქვეყნებულია სპორტსმენების მოკლე ბიოგრაფიები, რომლის თანახმადაც თავისუფალი სტილით მოჭიდავე ბესიკ კუდუხოვის დაბადების ადგილად მითითებულია ცხინვალი, ქვეყნად კი რუსეთი, ისევე როგორც, დენის ცარგუშის გრაფაში წერია - გუდაუთა, რუსეთი.

საქართველოს ეროვნულმა ოლიმპიურმა კომიტეტმა ამასთან დაკავშირებით განცხადება გააკეთა და „ლონდონი 2012"-ის საორგანიზაციო კომიტეტში გაგზავნა მოთხოვნა, რათა გამოსწორდეს ეს შეცდომა და ზემოაღნიშნულ სპორტსმენებს დაბადების ადგილად საქართველო მიეთითოს.

Internet.ge