დღეს, საქართველოს პრემიერ-მინისტრი ვანო მერაბიშვილი, სოფლის მეურნეობის მხარდაჭერის სამთავრობო პროგრამის ფარგლებში, თიანეთის რაიონის სოფელ ნაქალაქარს ესტუმრა. ვანო მერაბიშვილი პირადად გაეცნო ადგილობრივი მოსახლეობის პრობლემებს და ახალი სამთავრობო პროგრამის ფარგლებში მათი დაძლევის გზებზე ვრცლად ისაუბრა.

ნაქალაქარის ერთ-ერთ ოჯახში სტუმრობისას პრემიერ-მინისტრმა მსხვილფეხა რქოსანი პირუტყვის უფასო ვაქცინაციის სახელმწიფო პროგრამა წარმოადგინა, რომელიც სოფლის მეურნეობის მხარდაჭერის სამთავრობო პროგრამის ფარგლებში, აღნიშნულ სფეროში მოღვაწე მეცნიერებთან მჭიდრო თანამშრომლობის შედეგად შემუშავდა.

უფასო ვაქცინაციის სახელმწიფო პროგრამა მსხვილფეხა რქოსანი პირუტყვის დაავადებათა პრევენციაზეა ორიენტირებული. პროგრამის თანახმად, საქართველოს მთელი მასშტაბით 1 აგვისტოდან თურქულის, ხოლო 1 სექტემბრიდან ჯილეხის ვაქცინაცია დაიწყება. ამ მიზნით, დაახლოებით ერთ კვირაში იტალიიდან შემოვა 950 000 თურქულის ფრანგული წარმოების ვაქცინა, ხოლო უკრაინიდან და რუმინეთიდან ჯილეხის 180 000 ვაქცინა. ვაქცინაციის განსახორციელებლად შეიქმნა 250 მობილური ჯგუფი, რომლებიც ქვეყნის მასშტაბით 53 მუნიციპალიტეტის 3000 სოფელში ადგილზე განახორციელებენ ვაქცინაციას.

„გაცემულია განკარგულება და მთელი საქართველოს მასშტაბით მიმდინარეობს ყველა ვეტექიმის მობილიზაცია, მათი აღჭურვა ახალი ინსტრუმენტებით და რაც მთავარია დავიწყეთ დანომრვა და ყველა ძროხა უნდა იყოს აღრიცხული. აცრები არის უფასო და აცრების შედეგად ყველა იქნება დაზღვეული რომ საქონელი არ დაავადდება“,- განაცხადა პრემიერმა.

 internet.ge