დღეს, ფინანსთა მინისტრი, დიმიტრი გვინდაძე საქართველოს აგრარულ უნივერსიტეტში, სტუდენტებსა და პროფესორ-მასწავლებლებს შეხვდა.

აგრარული უნივერსიტეტის სტუდენტებს, დიმიტრი გვინდაძემ, ინფორმაცია მთავრობის პროგრამებზე მიაწოდა, რომლის მთავარი მიზანი დასაქმება და ახალი სამუშაო ადგილების შექმნაა.

ფინანსთა მინისტრმა ასევე, ისაუბრა  სახელმწიფო ფინანსების მართვის კუთხით მიღწეულ პროგრესზე და მიმდინარე რეფორმებზე, ქვეყნის მაკროეკონომიკურ დინამიკაზე, ენერგოსექტორის განვითარების ეკონომიკურ მნიშვნელობაზე და სხვ.

აგრარული უნივერსიტეტის სტუდენტებთან  შეხვედრისას ყურადღება გამახვილდა იმაზე, თუ როგორია სოფლის მეურნეობის წილი დღევანდელ ეკონომიკაში, რა თანხებია გამოყოფილი 2012 წლის სახელმწიფო ბიუჯეტში სექტორის მხარდასაჭერად და რა რეფორმები ტარდება საქართველოში აღნიშნული და სხვა დარგების სწრაფი განვითარების უზრუნველსაყოფად.

„ეს არის ლექციების ციკლი, რომელიც ეხება საქართველოში ეკონომიკურ ზრდას და დასაქმებას. ჩემთვის საინტერესო იყო აგრარულ უნივერსიტეტში გამართული შეხვედრა. ამ უნივერსიტეტმა ბოლო წლების განმავლობაში განიცადა მნიშვნელოვანი დადებითი ტრანსფორმაცია. სოფლის მეურნეობა არის ის დარგი, რომელიც თანამიმდევრულად ყალიბდება, როგორც ეკონომიკური ზრდისა და დასაქმების ერთ-ერთი გენერატორი ქვეყანაში,“ - განაცხადა ფინანსთა მინისტრმა.

ლექცია ორ საათს გაგრძელდა და ინტერაქტიულ რეჟიმში წარიმართა. მინისტრმა სტუდენტების მიერ დასმულ შეკითხვებს უპასუხა.

internet.ge