საქართველოს სახალხო დამცველმა, გამომძიებელ თენგიზ მაისურაძის წინააღმდეგ დისციპლინური სამართალწარმოების დაწყების წინადადებით,  საქართველოს ფინანსთა სამინისტროს საგამოძიებო სამსახურის უფროსს მიმართა.

სახალხო დამცველს განცხადებით მიმართა ბრალდებულ მელიქ რაისიანის ადვოკატმა. სახალხო დამცველის აპარატში წარმოდგენილი მასალების შესწავლის შედეგად დადგინდა, რომ საქართველოს ფინანსთა სამინისტროს საგამოძიებო სამსახურის, საგამოძიებო დეპარტამენტის გამომძიებელ თენგიზ მაისურაძის მიერ შესაძლოა ადგილი ჰქონდეს მელიქ რაისიანისა და მისი ადვოკატის თეიმურაზ კუტივაძის ბრალდების მხარისაგან მტკიცებულებათა შესახებ ინფორმაციის მიღების კანონიერი უფლების დარღვევას.

“ადვოკატი კუტივაძე სისხლის სამართლის საქმეში ბრალდებულ მელიქ რაისიანის ინტერესებს იცავს 2012 წლის 28 მაისიდან. ადვოკატმა 29 მაისს წერილობით მიმართა გამომძიებელ მაისურაძეს ბრალდებულის ბრალეულობის დამადასტურებელ მტკიცებულებათა ასლების გადაცემის მოთხოვნით. ადვოკატ თ.კუტივაძეს გადაეცა ინფორმაცია და ასლები მხოლოდ იმ მტკიცებულებათა შესახებ, რომლებიც მოპოვებულ იქნა ბრალდების მხარის მიერ სავალდებულო წესით დანიშნული ადვოკატისათვის მასალების გადაცემის შემდგომ პერიოდში. ადვოკატის მოთხოვნა მიზნად ისახავდა მისი კლიენტის ბრალეულობის შესახებ სრული ინფორმაციის მიღებას და რაისიანის ინტერესების დაცვის მიზნით შესაბამისი ღონისძიებების გატარებას, რისი საშუალებაც მას საქმის მწარმოებელმა გამომძიებელმა არ მისცა“,- ნათქვამია სახალხო დამცველის განცხადებაში.

სახალხო დამცველს მიაჩნია, რომ საქმის მწარმოებელმა გამომძიებელმა დაარღვია საქართველოს სისხლის სამართლის საპროცესო კოდექსის მოთხოვნები.

Internet.ge