საქართველოს ფოლკლორის სახელმწიფო ცენტრის საგამოფენო დარბაზში დღეს, აღდგომის ბრწყინვალე დღესასწაულისადმი მიძღვნილი გამოფენა გაიხსნება.

გამოიფინება ქრისტიანულ, განსაკუთრებით, სააღდგომო თემატიკაზე შექმნილი სამოცდახუთი ავტორის ასამდე ნამუშევარი. ფერწერით, ქარგულობით, ჭედურობით შესრულებული გარდამოხსნები, სამების, მაცხოვრის, ღვთისმშობლის, შობის, აღდგომის, საქართველოს ეკლესიის წმიდანთა ხატები.

ფოლკლორის ცენტრის ინფორმაციით, ექსპონატთა უმეტესობა შესრულებულია ოქრომკედით (ოქრონემსული, ოქრომკერდი) - ერთად შეგრეხილი ოქროსა და აბრეშუმის ძაფით ნაკერი ან ნაქარგი.

ოქრომკედით ქარგვის ტექნიკა საუკუნეებს ითვლის და მისი ცოდნა სავალდებულო იყო დიდგვაროვანი მანდილოსნებისთვის. ცნობილია, რომ თამარ მეფე მოწყალებისთვის არასდროს ხარჯავდა ხაზინის ფულს. ღამით ქარგავდა, ხელსაქმობდა, ყიდდა და ასე ეწეოდა თავის განთქმულ ქველმოქმედებას.  საქრთველოში  ქარგვის ოცდაათზე მეტი  სახეობაა  შემორჩენილი.

Internet.ge