საქართველოს ეკონომიკისა და მდგრადი განვითარების მინისტრი, ვერა ქობალია ყვარელში სტრატეგიული განვითარების სააგენტოს პრეზენტაციას დაესწრო. იუსტიციის სამინისტროს ინფორმაციით, მინისტრთან ერთად პრეზენტაციაზე ეროვნული საინვესტიციო სააგენტოს ხელმძღვანელი ქეთევან ბოჭორიშვილი, სტრატეგიული განვითარების სააგენტოს დირექტორი ივა დავითაია და ტურიზმის დეპარტამენტის ხელმძღვანელი  მაია სიდამონიძეც იმყოფებოდნენ.

სამინისტროს ინფორმაციით,  ქალაქის ცენტრში მასშტაბური კომპლექსის რეკონსტრუქცია იგეგმება. ამ ეტაპზე, სახელმწიფო კუთვნილებაში არსებული შენობა მომავალში ინვესტორს გადაეცემა, რომელიც მის შემდგომ ფუნქციონირებაზე იზრუნებს. კომპლექსში ერთდროულად განთავსდება სასტუმრო, რესტორანი, ღვინის მარანი, ტურისტული სააგენტო. კახეთის ტურისტული პოტენციალის გათვალისწინებით,  სასტუმრო-კომპლექსი უცხოელი და ქართველი დამსვენებლებისათვის საუკეთესო გასართობ ადგილად უნდა იქცეს.

მშენებლობა სარეაბილიტაციო პორექტების ფარგლებში ხორციელდება, რომლის ძირითადი მიმართულებები ამ ეტაპზე, კახეთისა და  იმერეთის რეგიონებს მოიცავს. მსგავსი ტიპის ტურისტული, ინფრასტრუქტურული და საინვესტიციო პროექტების ეფექტურად განხორციელების მნიშვნელობიდან გამომდინარე, მათი კოორდინაციისა და მონიტორინგის განსახორციელებლად, მიზანშეწონილად იქნა მიჩნეული, ახალი სტრუქტურული ერთეულის - სტრატეგიული განვითარების სააგენტოს შექმნა.

სტრატეგიული განვითარების სააგენტო საჯარო სამართლის იურიდიული პირია, რომელიც პრეზიდენტის ბრძანებულებით, მიმდინარე წლის აპრილში შეიქმნა. მის ფუნქციას საქართველოში განსახორციელებლი ცალკეული ტურისტული და საინვესტიციო პროექტების შესრულების კოორდინაცია და მონიტორინგი შეადგენს. პირველ ეტაპზე, სააგენტოს ძირითადი მიმართულებები კახეთში, იმერეთსა და ლაზიკაში  დაგეგმილი პროექტების კოორდინაცია იქნება.

სარეაბილიტაციო პროექტების არეალის გაფართოების პარალელურად, სააგენტო სხვა რეგიონების  სააღმშენებლო სამუშაოების კოორდინაციასაც განახორციელებს. სააგენტოს ივა დავითაია უხელმძღვანელებს.

Internet.ge