მთავრობა „შრომის კოდექსში“ ცვლილებების განხორციელებას გეგმავს, რომლის მიხედვით,  გაფიცვასთან დაკავშირებული გარკვეული მოთხოვნები იხსნება.  

როგორც “ინტერნეტ.ჯი”–ს მთავრობის საპარლამენტო მდივანმა, გია ხუროშვილმა განუცხადა, ქართული მხარე შრომის საერთაშორისო ორგანიზაციასთან აქტიურად თანამშრომლობს, რომელსაც „შრომის კოდექსთან“ დაკავშირებით, აქვს გარკვეული რეკომენდაციები, კონსულტაციების შედეგად, იქნა მიღებული გადაწყვეტილება ცვლილებების მომზადების შესახებ.

მისი თქმით, ამჟამინდელი ლიმიტი, რომელიც არსებობდა შრომით ურთიერთობაში გაფიცვის ხანგძლივობის კუთხით და რომელიც არ უნდა აღემატებოდეს 90 დღეს, უქმდება და ლიმიტი აღარ იარსებებს.

„თუ შრომითი კოლექტივი თვლის, რომ მათ  გაფიცვა შეუძლიათ, 90 დღიანი ლიმიტი აღარ იარსებებს,  მაგრამ ხელფასთან დაკავშირებულ საკითხს დამქირავებელი გადაწყვეტს,“ - აცხადებს ხუროშვილი.

მისივე თქმით, ცვლილება ასევე პროფესიული შრომითი კავშირის დაფუძნების საკითხსაც ეხება.

„მოქმედი კანონმდებლობის თანახმად, პროფესიული კავშირის დასაფუძნებლად, სულ მცირე 100 პირის ინიციტივა უნდა ყოფილიყო წარმოდეგნილი, რომელიც 50 პირამდე შემცირდა. ანუ, პროფესიული კავშირის დაფუძნება 50 პირს შეეძლება“, – აცხადებს ხუროშვილი.

Internet.ge