სამარაში ცემით მოკლული ქართველის მამუკა კახიშვილის ოჯახზე და მოწმეებზე რუსი სამართალდამცველები ზეწოლის მიზნით საქმეებს თითხნიან. კერძოდ, მოკლულის მამა ლუდის ქურდობაში დაადანაშაულეს. პოლიცია ლევან კახიშვილს 600 რუბლის ლუდის მოპარვას აბრალებს. მის სახლში უკვე ჩხრეკაც ჩაატარეს. „ეჭვმიტანილი" არ დაუკავებიათ, თუმცა ის დაკითხვაზე გამოძახებას ელოდება.

ასევე ცნობილი გახდა, რომ დიმიტრი ტრიშკინი, რომელიც კახიშვილის საქმეში მოწმედ გადის და რომლის ავტომანქანაც მამუკას ცემის შემდეგ დამწვარი ნახეს, დაკავებულია, როგორც ყაჩაღურ თავდასხმაში ეჭვმიტანილი.

კახიშვილების ოჯახის ადვოკატი ამბობს, რომ პოლიციის განცხადებით, ტრიშკინმა და მისმა ორმა მეგობარმა, 25 მარტს, ღამით, მანქანით, ზალიან ახლოს ცაუარეს ფეხით მოსიარულე მამაკაცს, რომელმაც მათი მისამართით ყვირილი დაიწყო, რის შემდეგაც მანქანაში მსხდომები გადმოვიდნენ, ტრიშკინის ერთ-ერთმა მეგობარმა კი, თითქოსდა, დანა ამოიღო. თავად ტრიშკინი ამტკიცებს, რომ მანქანიდან საერთოდ არ გადმოსულა, თუმცაღა სასამართლო მისი დაპატიმრების საკითხს მაინც განიხილავს.

როგორც სამარის საზოგადოებრივ-პოლიტიკური ინტერნეტ-პორტალი პარკგაგარინა.რუ იუწყება, კახიშვილების ადვოკატს ამ საქმესთან დაკავშირებით დადგენილება ანახეს, რომელშიც აღნიშნული ყაჩაღური თავდასხმის მონაწილედ მამუკა კახიშვილის მამაც სახელდება.

რუსეთის პირველ არხზე კი სამარელი მილიციელების მიერ მოკლულ მამუკა კახიშვილზე საუბარი აკრძალული თემაა - იუწყება რეგიონსამარა.რუ. მისი ინფორმაციით, გადაცემაში „О чем говорят", რომლის დროსაც რუსეთში აქტუალური საკითხი - მილიციის მიერ მოქალაქეებზე ძალადობის პრობლემა უნდა განეხილათ, კახიშვილის მშობლებიც იყვნენ მიწვეულები - თუმცა გადაცემის ჩაწერამდე კახიშვილების ოჯახს ტელეფონით დაუკავშირდნენ, როგორც უთხრეს, ურეკავდნენ გადაცემა „О чем говорят" რედაქციიდან და შეატყობინეს, რომ რედაქციაზე ზეწოლას ახორციელებდნენ.

კახიშვილის ადვოკატის, მაია საკსონოვას განცხადებით, გოგონას არ უთქვამს, თუ ვინ ახორციელებს ზეწოლას.

internet.ge