თბილისის საქალაქო სასამართლომ ამჟამად ძებნაში მყოფი ბრალდებულის ნიაზ გუსეინოვის მიმართ სისხლის სამართლის საქმის განხილვა დაასრულა.

სასამართლომ განსასჯელს სასჯელთა ნაწილობრივი შეკრების პრინციპის გამოყენებით 13 წლის და 9 თვის ვადით თავისუფლების აღკვეთა განუსაზღვრა.

სასამართლოს პრეს-სამსახურის ინფორმაციით, გუსეივოვს  ბრალად ედებოდა თაღლითობა, ყალბი ოფიციალური დოკუმენტის დამზადება და გამოყენება.

საქმის მასალების მიხედვით, 2003 წლის თებერვლის თვეში გაზეთ „ახალი აზროვნების“ მთავარ რედაქტორს, ნიაზ გუსეინოვს, აშშ-ის ვიზის მიღებაში დახმარების თხოვნით  დაუკავშირდა საქართველოს მეცნიერებათა აკადემიის  თანამშრომელი. გუსეინოვმა სამსახურეობრივი მდგომარეობა გამოიყენა და დაზარალებულს მოტყუებით ჯერ 3 000 დოლარი გამოართვა, ხოლო  შემდეგ,  პასპორტში  ყალბი ვიზის ჩაკვრის გზით, დაარწმუნა, თითქოს მასზე უკვე გაცემული იყო აშშ-ის ვიზა, რის სანაცვლოდაც დამატებით 7 500 დოლარი მიიღო.  

გარდა ამისა, გამოძიებამ დაადგინა, რომ 2003 წლის მარტში ნიაზ გუსეინოვმა  ვითომდა კანადაში გამგზავრების უზრუნველყოფის სანაცვლოდ, ცოლ-ქმარს  ჯერ  3 000 დოლარი, ხოლო შემდგომ 2 500 დოლარი გამოართვა.

გარდა აღნიშნულისა, განსასჯელმა და მისმა თანამზრახველებმა ყალბი დოკუმენტაციით შექმნეს ტურისტული სააგენტო და მოქალაქეებისგან 1 500 დოლარი თაღლითურად მიისაკუთრეს.

აღნიშნულ საქმეში ძებნაში მყოფის მიერ თაღლითური სქემით მითვისებული თანხებიც ფიქსირდება. მან 1 950 დოლარი მოტყუებით გამოსძალა საქართველოს მოქალაქეს. 2003 წელს კი, კიდევ ერთი პიროვნების მოტყუება შეძლო და 3 000 ლარი მიისაკუთრა. 

Internet.ge