საქართველოს შინაგან საქმეთა სამინისტრო აგრძელებს 13 თებერვალს მომხდარი აფეთქების მცდელობის ფაქტის გამოძიებას, რომლის სამიზნეც თბილისში, ისრაელის საელჩოს ადგილობრივი თანამშრომელი იყო.

როგორც შსს-ს მიერ გავრცელებულ განცხადებაშია ნათქვამი, აფეთქების მცდელობის უკან აშკარად იკვეთება უცხოური კვალი.

შეგახსენებთ, რომ 13 თებერვალს, თბილისში ისრაელის საელჩოს მძღოლმა კუთვნილ ავტომანქანა ‘’Hyundai Getz"–ში ასაფეთქებელი მოწყობილობა აღმოაჩინა, იმავე დღეს კი, ნიუ დელიში ისრაელის საელჩოს მანქანაზე მიმაგრებული ასაფეთქებელი მოწყობილობა ამოქმედდა, რის შედეგადაც ისრაელის დიპლომატის მეუღლე და კიდევ რამდენიმე ადამიანი დაშავდა.

ისრაელის პრემიერ–მინისტრმა ბენიამინ ნეთანიაჰუმ, ირანი დაადანაშაულა ნიუ დელიში მომხდარ აფეთქებაში და თბილისში აფეთქების მცდელობაში. ირანმა უარყო ბრალდებები და მას თეირანის წინააღმდეგ ისრაელის „ფსიქოლოგიური ომის“ ნაწილი უწოდა.

internet.ge