საინფორმაციო ანალიტიკური პორტალი "პრესა.ჯი", ვებ გვერდზე განხორციელებული კიბერ შეტევის შესახებ მასალას აქვეყნებს, რომელსაც უცვლელად გთავაზობთ: 

"უკანასკნელი დღეების განმავლობაში, ორ ერთ-ერთ ყველაზე რეიტინგულ ქართულ საიტებზე - "პრესა.ჯი"-სა და "დრონი.ჯი"-ზე ჰაკერული თავდასხმა განხორციელდა. სპეციალისტების განცხადებით, ეს იყო მიზანმიმართული ე.წ. DDOS შეტევა, რომელსაც სავარაუდოდ ჰაკერთა ჯგუფი ახორციელებდა. 48 საათის განმავლობაში, კიბერ–დამნაშავეები პერმანენტულად უტევდნენ რამდენიმე ქართულ საიტს, რამაც ვებ-გვერდების პარალიზება გამოიწვია.

გუშინ კი, ცნობილი გახდა, რომ საქართველოს შინაგან საქმეთა სამინისტრომ, ერთ–ერთი ეჭვმიტანილი – ლევან დარჯანია დააკავა. ირკვევა, რომ ინტერნეტ–პორტალებზე ჰაკერული შეტევისათვის, კიბერ-თავმდამსხმელებმა ქართველი ინტერნეტ–მომხმარებლების 7 000–მდე აიპ-მისამართი (კომპიუტერის უნიკალური იდენტიფიკატორი) გამოიყენეს. ამის განხორციელება ტექნიკურად რამდენიმე ჰაკერსაც შეუძლია.  

ჰაკერული შეტევის დროს გამოყენებული აიპი–ების მფლობელებს, უკვე ეცნობათ ამის შესახებ. თუმცა, არსებობს მეორე ნაწილი, რომელთათვისაც შეტყობინება ამ ეტაპზე ვერ მოხერხდა. ამიტომ ასეთი აიპი მისამართები, ამ დროისათვის, ავტომატურად დაბლოკილია. წინააღმდეგ შემთხვევაში, იარსებებს საფრთხე, რომ მათი კომპიუტერის უნიკალური კოდი კვლავ იქნეს გამოყენებული კიბერ–დამნაშავეების მიერ თავდასხმის გასამეორებლად.

ამ მიზეზით, ინტერნეტ მომხმარებელთა ნაწილი, ამ დროისათვის, "პრესა.ჯი"–სა და "დრონი.ჯი"–ზე შემოსვლას ვერ ახერხებს, რისთვისაც ადმინისტრაცია ბოდიშს იხდის. მდგომარეობა საბოლოოდ გამოსწორდება უახლოეს მომავალში. 

არსებული უკანასკნელი ინფორმაციით, სამართალდამცველი ორგანოები კვლავ აგრძელებენ გამოიძიებას, რის შედეგადაც, წინასწარი მონაცემებით, შესაძლოა, დანაშაულებრივი დაჯგუფების გამოვლენა მოხდეს.

პირველი მასშტაბური შეტევა ქართულ საიტებზე, 2008 წლის აგვისტოს ომის დროს განხორციელდა. ამ შეტევის შედეგად, მაშინ რამდენიმე სამთავრობო საიტიც დაზარალდა. მას შემდეგ, „კავკასიის ინტერნეტ მედია ჯგუფის“ საიტებზე თავდასხმა ყველაზე მასშტაბური იყო ქართულ ინტერნეტ-სივრცეში." 

წყარო

internet.ge