ქურდმა, რომელმაც ცნობილი ესპანელი მხატვრის, სალვადორ დალის  „Carter des Don Juan Tenorio“ მოიპარა, გალერეას სურათი ავიაფოსტით დაუბრუნა. ნიუ-იორკის პოლიცია იტყობინება, რომ ნამუშევარი ჯონ კენედის სახელობის აეროპორტის საფოსტო განყოფილებაში აღმოაჩინეს. აკვარელში შესრულებული ნახატი, რომლის ღირებულებაც 150 ათას დოლარს აჭარბებს, მანჰეტენში ევროპიდან გამოგზავნეს.

სურათი მცირე ამანათში იდო და მას გაურკვეველი კალიგრაფიით ეწერა გამომგზავნის ვინაობა. პოლიცია ვარაუდობს, რომ მითითებული სახელი და გვარი გამოგონილია. შემოწმების შედეგად აღმოჩნდა, რომ თავად ნახატი შესანიშნავ მდგომარეობაშია.

ნამუშევარი, რომელიც მანჰეტენის სამხატვრო გალერეიდან მოიპარეს, საკმაოდ უცნაურ ვითარებაში აღმოაჩინეს. გალერეას ელექტრონულ მისამართზე მისწერეს, რომ სურათს უკან უბრუნებდნენ და ამანათის საიდენტიფიკაციო ნომერიც მიუთითეს. ამის შემდეგ პოლიციას აეროპორტში მისი პოვნა აღარ გასჭირვებია.

internet.ge