უკრაინის ექს-პრეზიდენტს, ლეონიდ კუჩმას კვლავ უწევს იმის მტკიცება, რომ ქართველი ჟურნალისტის, გიორგი ღონღაძის მკვლელობაში დამნაშავე არ არის.
ამის შესახებ გამოცემა „ცენზორ.ნეტ“ კუჩმას პრესსამსახურზე დაყრდნობით იუწყება.

„მედიაში გავრცელდა გენერალური პროკურორის მოადგილის, რ. კუზმინის ინფორმაცია იმის შესახებ, თითქოსდა, მე კავშირში ვარ მკვლელობასთან. კიდევ ერთხელ ვუცხადებ უკრაინელ ხალხს, რომ არანაირი კავშირი არ მაქვს ტრაგედიასთან, რომელიც ჟურნალისტ გიორგი ღონღაძეს შეემთხვა“ - აცხადებს კუჩმა და დასძენს, რომ ეს უკვე დაადასტურა სასამართლომაც, რომელმაც მის მიმართ სისხლის სამართლის საქმის აღძვრა უსაფუძვლოდ მიიჩნია.

ამასთან, კუჩმა აცხადებს, რომ გიორგი ღონღაძის მკვლელობის საქმე აუცილებლად უნდა იქნეს გამოძიებული, თუმცა ეს არ უნდა გახდეს უსფუძვლო დევნისა და სპეკულაციების მიზეზი.

უკრაინის გენპროკურორის პირველმა მოადგილემ რენატ კუზმინმა „კიევ თაიმსთან“ ინტერვიუში განაცხადა, რომ პროკურატურას აქვს მტკიცებულებები, რომ ექს-პრემიერებს იულია ტიმოშენკოსა და პაველ ლაზარენკოს, ასევე ყოფილ პრეზიდენტს ლეონიდ კუჩმას პირდაპირი კავშირი ჰქონდათ მკვლელობებთან.

„ჩვენ ახლა ვმუშაობთ იმაზე, რომ საკმარისი მტკიცებულებები მოვაგროვოთ, რომლებიც ბრალის წაყენების საშუალებას მოგვემს“ - განაცხადა კუზმინმა.
მანამდე უკრაინული მედია იუწყებოდა, რომ გენერალურმა პროკურატურამ, შეიძლება, კუჩმას საქმის რეამინირება მოახდინოს.

internet.ge