სამხრეთ ოსეთის ე.წ. გენერალური პროკურატურის საგამოიძიებო განყოფილების უფროსი როლანდ ჩიტაევი, რომელიც წუხელ 22:00 საათზე გაიტაცეს, მოკლულია. ამის შესახებ ინფორმაციას ადგილობრივი „ოსრადიუო“ ავრცელებს. ამასთან, საინფორმაციო საშუალებები იუწყებიან, რომ  თანამშრომლის დაღუპვის ფაქტი ე.წ. გენპროკურატურამ უკვე დაადასტურა.

ადგილობრივი მედია წერს, რომ დამნაშავეები უკვე დაკავებულები არიან. გატაცებულის ავტომანქანა კი კოხათის დასახლებულ პუნქტში იპოვეს.

გატაცებისა და მკვლელობის შესახებ ინფორმაციამ მოსახლეობაში მღელვარება გამოიწვია. წუხელ ცხინვალელების ნაწილი ახალი ცნობების მოლოდინში ე.წ. შსს-თან შეიკრიბნენ.

ცხინვალის გენპროკურარმა მერაბ ჩიგოევმა განაცხადა, რომ პროკურატურის საგამოძიებო განყოფილების უფროსის როლანდ ჩიტაევის გატაცება და მკვლელობა მის სამსახურებრივ საქმიანობას უკავშირდება.

პირები, რომლებიც დააკავეს, აღმოჩნდნენ ძალოვანი და სამართალდამცავი უწყებების თანამშრომლები: ე.წ. სახელმწიფო დაცვის სამსახურის მოქმედი თანამშრომელი არტურ აგაევი და გენპროკურატურის ყოფილი თანამშრომელი რუსლან გაბარაევი, რომელიც სამსახურიდან გასული წლის შემოდგომაზე გააგადეს. ორივე ნასვამები იყვნენ. დაკითხვაზე კი ჩიტაევის მკვლელობა აღიარეს, თუმცა მიზეზი გარკვევით ვერ ახსენს.

მოკლული ჩიტაევი, რომელიც დღეს დილით სოფელ ვანათში ერთ-ერთი დანგრეული სახლის ეზოში იპოვეს, ძლიერადაა ნაცემი, სხეულზე კი ორი ტყვია აქვს მოხვედრილი.
გენპროკურორის ეჭვი არ ეპარება, რომ მკვლელობა მის სამსახურებრივ საქმიანობას უკავშირდება, მკვლელობის შემკვეთები და შემსრულებლები კი, ჩიგოევის თქმით, ისინი არიან, ვისაც არ სურს რეგიონში წესრიგის დამყარება.

კითხვაზე, შეიძლება თუ არა მკვლელობასთან კავშირი ჰქონდეს გენპროკურორის ყოფილ მოადგილეს ელდარ კოკოევს, ჩიგოევმა განაცხადა, რომ ჩიტაევი იყო დაკავებული კოკოევის სამსახურებრივი მოღვაწეობის თემის გამოძიებით და ასეთი ვერსია განიხილება, თუმცა ჯერ მას ვერაფრით დაადასტურებს.

internet.ge