პოპულარული როკ-ჯგუფ Deep Purple-ის ერთ-ერთი დამაარსებელი და ყოფილი პიანისტი ჯონ ლორდი 71 წლის ასაკში გარდაიცვალა. მისი ახლობელი ადამიანების თქმით, მუსიკოსს დიდი ხნის განმავლობაში აწუხებდა კუჭქვეშა ჯირკვლის კიბო. გარდა ამისა, მას ფილტვის არტერიების თრომბოემბოლიაც ჰქონდა, რამაც საერთო ჯამში, მისი გარდაცვალება გამოიწვია.

ჯონ ლორდმა ლეგენდარული ჯგუფი 1968 წელს იან პეისთან ერთად დააარსა. იგი Deep Purple-ის მრავალი ჰიტის ავტორია, მათ შორის ცნობილი სიმღერის - „Smoke on the water“. ლორდი ჯგუფის უცვლელი კლავიში იყო, სანამ 2002 წელს არ გამოეყო მას. 

ბოლო ხანს მუსიკოსი სოლო ნამუშევრებითა და გამოსვლებით იყო დაკავებული. იგი განსაკუთრებულ ყურადღებას უთმობდა კლასიკურ მუსიკას, რომელიც ჯაზის კომპოზიციებს შეიცავდა. 2011 წელს ის იძულებული გახდა, შეეჩერებინა აქტიური შემოქმედებითი და გასტროლითი მოღვაწეობა, რათა ონკოლოგიური დაავადებისთვის ემკურნალა.

Internet.ge