კოლორადოს შტატში მომხდარი ტრაგედიის გამო აშშ-ში ხუთდღიანი გლოვაა გამოცხადებული. „ბეტმენის“ პრემიერაზე კინოთეატრში შეიარაღებული თავდამსხმელის შეჭრას 12 ადამიანი ემსხვერპლა, 60-მდე კი - დაშავდა. დამნაშავე დაკავებულია და მას პოლიცია კითხავს.

როგორც ირკვევა, მკვლელმა თავი ფილმის ერთ-ერთ მთავარ პერსონაჟად, ჯოკერად წარმოიდგინა. პერსონაჟთან მისამსგავსებლად, მან თმები წითლად შეიღება, პრემიერაზე ბილეთი შეიძინა და სეანსზე სხვა მაყურებლებთან ერთად შევიდა. შუქის ჩაქრობისთანავე, ბრონირებულ ჟილეტში ჩაცმული შეიარაღებული მამაკაცი, აირწინაღითა და ჩაფხუტით, სცენაზე ავარდა. თავდაპირველად მან მაყურებლებს ცრემლსადენი გაზის ხელყუმბარები დაუშინა. დარბაზში მსხდომებმა ეს თეატრალური წარმოდგენის ნაწილად მიიჩნიეს, თუმცა შემდეგ თავდამსხმელმა სროლა ატეხა.

დამნაშავე კინოთეატრის მახლობლად მდებარე ავტოსადგომზე დააკავეს. მას სამართალდამცავებისთვის წინააღმდეგობა არ გაუწევია. 24 წლის ჯეიმს ჰოლმსმა განაცხადა, რომ მისი ბინაც დანაღმული იყო. ადგილზე მისულ პოლიციელებს საკმაოდ რთული ასაფეთქებელი მოწყობილობა დახვდათ. მის განაღმვაზე ინჟინრები ამ დრომდე მუშაობენ.

პოლიციის წარმომადგენელთა განცხადებით, დაკავებულს კრიმინალური წარსული არ აქვს. იგი მხოლოდ სიჩქარის გადაჭარბებისთვის არის დაჯარიმებული 2011 წელს. ამ დროისთვის უკვე ცნობილია, რომ დანაშაულის ჩადენისას იგი მარტო მოქმედებდა. სამართალდამცავები არ გამორიცხავენ, რომ მკვლელს რაიმე სახის ფსიქიკური დარღვევა ჰქონდეს.

Internet.ge