საქართველოს შეიარაღებული ძალების 28 სამხედრო მოსამსახურემ „რეინჯერის კურსი“ წარმატებით დაასრულა. კურსის დახურვის საზეიმო ცერემონია დღეს საქართველოს თავდაცვის სამინისტროში გაიმართა. წარჩინებულ კურსდამთავრებულებს სერტიფიკატები საქართველოს თავდაცვის მინისტრმა დიმიტრი შაშკინმა გადასცა. 

თავდაცვის სამინისტროს ინფორმაციით, „რეინჯერის კურსი“ 2012 წლის 23 აპრილს დაიწყო და 29 ივნისს დასრულდა. კურსის განმავლობაში ქართველმა სამხედროებმა ტყეში, მთაში, დასახლებულ რაიონებში, რთული რელიეფისა და მკაცრი ამინდის პირობებში საბრძოლო ოპერაციების ჩატარება შეისწავლეს და ლიდერების უნარ-ჩვევები გამოიმუშავეს. 

კურსის გავლის სურვილი შეიარაღებული ძალების 413-მა ოფიცერმა და სერჟანტმა გამოთქვა. თეორიული ტესტის გავლის შემდეგ კურსი 310-მა სამხედრო მოსამსახურემ დაიწყო. რთული პირობების, თეორიული, პრაქტიკული და დისციპლინარული დავალებების დაძლევა მხოლოდ 28 სამხედრო მოსამსახურემ შეძლო. კურსდამთავრებულები შეიარაღებული ძალების სხვადასხვა ქვედანაყოფებში გააგრძელებენ მსახურს. 

internet.ge