როგორც „კავკაზ-ონლაინ“ იუწყება, ნაზრანში ანტიტერორისტული ეგიდით ჩატარებული სპეცოპერაცია სინამდვილეში მშვიდობიანი მოსახლეობის ჩახოცვა აღმოჩნდა. თუმცაღა, რუსეთის ნაციონალური ანტიტერორისტული კომიტეტი აცხადებდა, რომ 5 ბოევიკის ლიკვიდაცია მოახდინა, რომელთაგან ორს „შახიდის ქამარი“ ეკეთა.

იმის შესახებ, რომ უდანაშაულო მოქალაქეების ლიკვიდაცია მოხდა, მას შემდეგ გახდა ცნობილი, რაც ერთ-ერთი მსხვერპლის შვილმა განაცხადა, რომ მოკლული იყო მისი დედა - ზინა ველხიევა, რომელიც სამსახურიდან სახლში ბრუნდებოდა. ის ნაზრანის აგურის ქარხანაში მუშაობდა, საიდანაც თანამშრომლებთან ერთად ერთ-ერთის მანქანით, სოფელ პლიევოში მიდიოდა. სწორედ ამ დროს, მათ ორი ავტომობილით დაეწივნენ და სროლა დაუწყეს.

ავტომანქანაში მჯდომი ხუთივე ადამიანი დაიღუპა. როცა თავდამსხმელები ამაში დარწმუნდნენ, კიდევ ერთხელ მიუშვეს იარაღის ჯერი მანქანის მიმართულებით, რა დროსაც მანქანა, რომელშიც ცხედრებიღა იყო, აფეთქდა.

გარდაცვლილ ზინა ველხიევას შვილმა ორგანიზაცია „მემორიალსა“ და ადგილობრივ პროკურატურას უკვე მიმართა.

უნდა აღინიშნოს, რომ რუსეთის ანტიტერორისტული კომიტეტი მედიაში აღნიშნული სპეცოპერაციის წარმატებაზე საუბრობდა და ამბობდა, რომ განადგურებული „ბანდიტები, იმ ბანდფორმირების წევრები იყვნენ, რომელმაც სავარაუდოდ 30 მარტს ნაზრანში მსუბუქი ავტომანქანა ააფეთქა, რომ ამ ავტომანქანაში რესპუბლიკური ფედერალური უშიშროების სამსახურის თანამშრომელი იჯდა“.

Internet.ge