იტალიის სერია “ა”-ს 26-ე ტურის გადმოტანილ შეხვედრაში მანუჩარ მარკოიშვილისა და გიორგი შერმადინის “ბენეტ კანტუმ” სეზონის ერთ-ერთ მთავარ შეხვედრაში ქვეყნის ჩემპიონი სიენას “მონტეპასკი” ოვერტაიმში დაამარცხა 95-94.

გადავსებულ “პალასპორტ პიანელაზე” კანტუელები თავიანთი ძირითადი ცენტრის, 23 წლის შერმადინის გარეშე გამოვიდნენ, რომელმაც გუშინწინ ოპერაცია გადაიტანა ფეხზე და ახლა 6-12 კვირა დასჭირდება კონდიციების აღსადგენად.

სამაგირეოდ სასტარტო ხუთეულში გამოვიდა გუნდის მეორე ქართველი ლეგიონერი, მარკოიშვილი, რომელმაც მთლიანობაში მოედანზე 29 წუთი გაატარა და ამ დროის განმავლობაში 10 ქულა და 4 მოხსნა დააგროვა. “მანუმ” 5-დან 2 ორქულიანი და 9-დან 6 საჯარიმო ჩააგდო, ხოლო 1 სამქულიანი ააცილა.

ამ გამარჯვების შემდეგ “ბენეტ კანტუ” მიუახლოვდა სატურნირო ცხრილში პირველ ადგილზე მყოფ “მონტეპასკის” და სავარაუდოა, რომ საჩემპიონო ტიტულისათვის სწორედ ეს ორი გუნდი იბრძოლებს.

Internet.ge