საქართველოს 17-წლამდე ფეხბურთელთა ნაკრები ევროპის ჩემპიონატს ნახევარფინალური ეტაპიდან გამოეთიშა. გუშინ, 13 მაისს, ლუბლიანაში, სტადიონ „სტოჟიცეზე“ გამართულ მატჩში, მსაჯის მიერ პირველივე წუთებიდან კაცნაკლულად დარჩენილი საქართველო, ჰოლანდიასთან 0:2 დამარცხდა და ევროპის ჩემპიონატს გამოეთიშა. მიუხედავად იმისა, რომ ქართველი ფეხბურთელები მე-15 წუთიდან მოედანზე ათნი იმყოფებოდნენ, (მსაჯმა კაპიტანი ნიკა ჭანტურია გააძევა)  ისინი უდიდეს წინააღმდეგობას უწევდნენ ჰოლანდიელ თანატოლებს და ბოლო წუთამდე ინარჩუნებდნენ კიდევაც სასურველ ფრეს,თუმცა, საბოლოოდ, ჰოლანდიელებმა 2 გოლის გატანა შეძლეს და ფინალის საგზური გაინაღდეს, სადაც მათ ნახევარფინალში პოლონეთის დამმარცხებელი გერმანია ელოდებათ.

ჰოლანდია – საქართველო 2:0 (0:0)

ჰოლანდია: ოლეი, ანდერსონი, ბაზური, ჰენდრიქსი, ვუსტი, ჰაიე, აკე, მენიგი, ვილიენა, ვლუტი (ჰუსერი, 58), ლუმუ (აკოლასტე, 70).

საქართველო: ადამია, კაკაბაძე, ჭანტურია, გაბაძე, გოროზია, სამხარაძე, პაპუნაშვილი, აბურჯანია (ჭეჭელაშვილი, 71), წილოსანი, მზევაშვილი (ჯიქია, 60), დარციმელია.

გოლები: ჰენდრიქსი (79), ჰაიე (82).

გაფრთხილება: ჭანტურია (15), ჭანტურია (16), აბურჯანია (19), ვოესტი (20), კაკაბაძე (70).

მსაჯი: მარიუს ავრამი (რუმინეთი).

Internet.ge