საქართველოს  სპორტისა და ახალგაზრდობის საქმეთა სამინისტროს მხარდაჭერითა და ფეხბურთის ფედერაციის ორგანიზებით, ფეხბურთში C კატეგორიის მწვრთნელთა კვალიფიკაციის ამაღლებისა და გადამზადების პროგრამა სრულდება, რომელსაც ესპანელი სპეციალისტები უძღვებიან.

პროგრამის ფარგლებში, ჯამში 11 ესპანელი მწვრთნელის ხელმძღვანელობით 34 ქართველი მწვრთნელისათვის თეორიული და პრაქტიკული მეცადინეობები 7 მაისიდან მიმდინარეობდა. გადამზადება C ლიცენზიის მქონე მწვრთნელებს ხელს შეუწყობს უეფას B ლიცენზიის მისაღებად საჭირო გამოცდილებისა და ცოდნის შეძენაში.

მეცადინეობების სრული კურსის გავლის შემდეგ, ესპანელმა სპეციალისტებმა - ფერნანდო გომეს კოლომერმა, ხაბიერ რუბიომ და ხოსე კასინიასმა 24 ივლისს მიხეილ მესხის სახელობის სტადიონის საპრესკონფერენციო დარბაზში საინფორმაციო შეხვედრა გამართეს. პრესკონფერენციას სპორტისა და ახალგაზრდობის საქმეთა მინისტრი ლადო ვარძელაშვილი, მისი მოადგილეები  - დავით კასრაძე და დავით ნამგალაური, და ფეხბურთის ფედერაციის პრეზიდენტი - ზვიად სიჭინავა დაესწრნენ.

"სწავლების პროცესმა კარგად ჩაიარა. დიდი მადლობა ჩვენს ესპანელ მეგობრებს, რომელთაც ქართველი მწვრთნელები იმავე პროგრამით გაატარეს, რომლითაც ესპანეთში ხელმძღვანელობენ. ეს იყო ექსპერიმენტის დონეზე და კარგი სარგებელი ვნახეთ; ქართველმა მწვრთნელებმა ბევრი ისწავლეს და კვალიფიკაცია აიმაღლეს. C კატეგორიის ლიცენზირების პროცესი სექტემბერში გაიმართება და იქ გამოჩნდება, რამდენად კარგად გავიარეთ ეს პროცესი," - განაცხადა ვარძელაშვილმა.

Internet.ge