საქართველოს ეროვნული ოლიმპიური კომიტეტი ლონდონის ოლიმპიური თამაშების ოფიციალურ ვებ-გვერდზე გამოქვეყნებულ ინფორმაციას ეხმაურება. ქართული მხარის მიერ გავრცელებულ განცხადებაში ნათქვამია, რომ აფხაზეთისა და სამხრეთ ოსეთის რუსეთის ტერიტორიად მოხსენიებასთან დაკავშირებით, „ლონდონი 2012"-ის საორგანიზაციო კომიტეტში უკვე გაიგზავნა მოთხოვნა შეცდომის გამოსასწორებლად:

„ლონდონის ოლიმპიური თამაშების ოფიციალურ ვებ-გვერდზე, სადაც ყველა მონაწილე ქვეყნის სპორტსმენთა დოსიეა გამოქვეყნებული, რუსეთის გუნდის მიერ წარდგენილი ფორმულიარით სამხრეთ ოსეთი და აფხაზეთი რუსეთის ტერიტორიად არის აღნიშნული.

კონკრეტულად, თავისუფალი სტილით მოჭიდავეების - ბესიკ კუდუხოვისა (სამხრეთ ოსეთი, საქართველო) და დენის ცარგუშის (გუდაუთა, აფხაზეთი, საქართველო) ბიოგრაფიებში დაბადების ადგილად მითითებულია რუსეთის ფედერაცია.

ამ ფაქტს მოყვა სეოკ-ის მძაფრი პროტესტი და „ლონდონი 2012"-ის საორგანიზაციო კომიტეტში გაიგზავნა განცხადება მოთხოვნით, რომ გამოსწორდეს ეს შეცდომა და ზემოაღნიშნულ სპორტსმენებს დაბადების ადგილად მიეთითოს საქართველო,“ - აღნიშნულია განცხადებაში.

Internet.ge