Canon-მა დამწყები დონის ახალი კამერა EOS 650D წარადგინა. ეს არის კომპანიის პირველი მოდელი, რომელსაც სენსორული თხევად-კრისტალური ეკრანი ექნება მულტი-შეხების ჟესტების მხარდაჭერით.

როგორც CNET იტყობინება, ახალი კამერა სამოყვარულო ფოტოაპარატის EOS 600D-ის შვილობილია, რომელიც გასულ წელს გამოვიდა.

EOS 650D-ის მნიშვნელოვან მახასიათებლებს შორისაა 18 მეგაპიქსელიანი APS-C-ის ფორმატის CMOS-სენსორი, DIGIC 5-ის გრაფიკული პროცესორი და ავტოფოკუსირების 9 პუნქტიანი გაფართოვება. ISO-ს მგრძნობელობის დიაპაზონი 100-დან 12,800 ერთეულამდე მერყეობს (გაფართოება 25,600-მდე).

ეკრანის დიაგონალი, რომელიც Clear View II-ის ტექნოლოგიებითაა დამზადებული, 3 დიუმიანია. მისი შემობრუნება 270 გრადუსითაა შესაძლებელი. აპარატს შეუძლია სერიული კადრების გადაღება წამში 5 კადრის სიჩქარით, ასევე, Full HD-ის ფორმატის ვიდეოების გაკეთებაც.

გარდა ამისა, EOS 650D-ზე შესაძლებელია გარე მიკროფონის ან HDTV-ის ტელევიზორის შეერთებაც. მთლიანობაში კამერის წონა 575 გრამია.

აშშ-ში EOS 650D-ის გაყიდვა ივნისის ბოლოს დაიწყება და მისი ფასი 850 დოლარი იქნება. EF-S 18-55 მმ f/3.5-5.6 IS II-ის ობიექტივთან ერთად მისი ღირებულება 950 დოლარამდე გაიზრდება, STM-ოპტიკასთან ერთად კი 1 200 დოლარი დაჯდება.

Internet.ge